Na Mwandishi wetu, Dar es Salaam
WATENDAJI wa uchaguzi wametakiwa kutoa mafunzo kwa Wasimamizi Wasaidizi wa Uchaguzi ngazi ya Kata ili kuwawezesha kuratibu na kusimamia uchaguzi ngazi vizuri na kwa weledi na kuzingatia sheria na kanuni za uchaguzi.
Hayo yamebainishwa Julai, 23 2025 na Mjumbe wa Tume Huru ya Taifa ya Uchaguzi (INEC), Balozi Omar Ramadhan Mapuri, wakati akifunga mafunzo ya watendaji na wasimamizi wa uchaguzi kutoka mikoa ya Pwani na Dar es Salaam yaliyoanza Julai 21, 2025.
Amesema kuwa kuwawezesha Wasimamizi Wasaidizi wa Uchaguzi ngazi ya Kata ni hatua muhimu kwa ajili ya kuhakikisha uchaguzi utafanyika kwa ufanisi na kwa kuzingatia misingi ya demokrasia.
“Wasimamizi Wasaidizi ngazi ya Kata ni kiungo muhimu katika kuhakikisha kuwa uchaguzi unafanyika kwa kuzingatia katiba, sheria, na kanuni zilizowekwa. Mafunzo haya ni muhimu kwa kuwawezesha kutekeleza majukumu yao kwa weledi na kwa kuzingatia misingi ya haki,” amesema Balozi Mapuri.
Amesisitiza kuwa Wasimamizi Wasaidizi ni sehemu muhimu katika mchakato mzima wa uchaguzi, kwani wao ndio watakao kuwa mstari wa mbele kuhakikisha kuwa uchaguzi unaratibiwa kwa haki na usawa.
Ameeleza kuwa washiriki wa mafunzo hayo walijifunza kuhusu namna ya kusimamia vituo vya kupigia kura, kusimamia daftari la wapiga kura, na namna ya kukabiliana na changamoto zinazoweza kutokea wakati wa uchaguzi.
Aidha, walipata mafunzo kuhusu haki na wajibu wa wapiga kura, udhibiti wa matumizi ya vifaa vya uchaguzi, na hatua za usalama zinazopaswa kuchukuliwa kabla, wakati, na baada ya uchaguzi.
“Washiriki walifundishwa jinsi ya kutumia mifumo ya kidijitali kwa ufanisi, na jinsi ya kuhakikisha kuwa maelekezo yanayotolewa kwa wapiga kura yanafikiwa na kuzingatiwa. Walijifunza pia namna ya kushughulikia malalamiko na matatizo yatakayojitokeza wakati wa mchakato wa uchaguzi,”amesema.
Balozi Mapuri ameongeza kuwa ni muhimu kwa mafunzo haya kuendelezwa kwa mikoa mingine ya nchi ili kuhakikisha kuwa watendaji wote wanakuwa na ujuzi na maarifa ya kutosha ya kusimamia uchaguzi katika maeneo yao.
Ameitaka INEC kuhakikisha kuwa mafunzo haya yanatolewa kwa wakati na kwa kiwango cha juu cha ubora ili kila mtendaji aweza kutekeleza majukumu yake kwa ufanisi.
Mafunzo haya ni sehemu ya maandalizi ya Uchaguzi Mkuu wa mwaka huu na yanatarajiwa kuwa na manufaa makubwa katika kuhakikisha kuwa uchaguzi unafanyika kwa utulivu na kwa kuzingatia misingi ya demokrasia na yalilenga kuwawezesha washiriki kupata uelewa mpana kuhusu masuala ya kisheria, kikanuni na kiutendaji katika utekelezaji wa uchaguzi.
