đź“ŚMradi wa umeme wa jua wafikia asilimia 84 ya utekelezaji
đź“ŚTwange aagiza ukamilishwe ifikapo Januari 15, 2026
Na Mwandishi Wetu, Shinyanga
MKUU wa Wilaya ya Kishapu mkoani Shinyanga, Peter Masindi, amesema mradi wa umeme unaozalishwa kwa nguvu ya jua ni kielelezo cha ongezeko la uzalishaji wa umeme nchini ikiwa ni dhamira ya Serikali ya Rais Dkt Samia Suluhu Hassan ya kutaka kuongeza uzalishaji umeme hadi kufikia jumla ya megawati 8000 ifikapo mwaka 2030.
Masindi aliyasema hayo Novemba 28, 2025, alipoambatana na Mkurugenzi Mtendaji wa TANESCO, Lazaro Twange, kukagua maendeleo ya Mradi wa kuzalisha umeme wa jua unaotekelezwa wilayani humo.
Amesema mradi huo sio tu utakuwa na faida kwa wananchi wa Mkoa wa Sinyanga pekee bali hadi katika mikoa ya Jirani ambapo pia amesema zaidi ya wananchi 1,200 waliokuwa wakiendesha shughuli zao katika eneo la Mradi tayari wamelipwa fidia na kwamba jamii imeupokea mradi kwa mtazamo chanya na imekuwa mstari wa mbele kulinda miundombinu.
“Mradi huu ni tegemeo kwa wananchi wa Kishapu wamekuwa mstari wa mbele kuhakikisha miundombinu inalindwa. Wameuelewa Mradi na wanaufurahia,” amesema Masindi.
Naye, Mkurugenzi Mtendaji wa TANESCO, Lazaro Twange, ameeleza kuwa mradi huo ni miongoni mwa miradi ya kielelezo inayotakiwa kukamilika ndani ya siku 100 tangu kuapishwa kwa Rais Dk. Samia Suluhu Hassan, ambaye ameelekeza kiasi cha shilingi bilioni 118 kwa ajili ya utekelezaji wake.
Vilevile, amemuagiza mkandarasi anayetekeleza mradi kuhakikisha unakamilika ifikapo Januari 15, 2026, akibainisha kuwa haitatolewa nyongeza ya muda na kwamba kinyume chake hatua za kisheria zitachukuliwa.
“Tunamshukuru sana Mheshimiwa Rais kwa kutupatia takribani shilingi bilioni 118 kutekeleza mradi huu. Wajibu wetu ni kuhakikisha unakamilika kwa wakati. Watanzania waelewe kuwa dhamira ya Mheshimiwa Rais ni kuongeza uzalishaji wa umeme. Kwa sasa tunazalisha zaidi ya megawati 4,000, na kadri tunavyoongeza vituo vya kuzalisha umeme ndivyo usambazaji unavyokuwa rahisi kwa wananchi,” amesisitiza Twange.
Ziara ya Mkurugenzi Mtendaji wa TANESCO imelenga kukagua maendeleo ya miradi ya umeme katika mikoa ya kanda ya ziwa ukiwemo Mkoa wa Shinyanga, Mara, Geita na Kagera ambapo kwa sasa Mradi wa Kishapu umefikia asilimia 84 ya utekelezaji wake.
